Ваяр з Барані


15:44 17.01.2020


Bookmark and Share


Нашчадка харобрай вялікалітоўскай шляхты вам не зламаць.


З Шэрым Катом (Зьмітром Казловым) мы пазнаёміліся ў Курапатах. Мінулай зімой ён як блогер прыехаў здымаць варту, крыжы - і стаў адным з нас, абаронцаў.


Зьміцер - мой зямляк. Ня толькі аршанскі - ён з Барані. А гэта шмат значыць.


У Барані, што пад Воршай, мы, Севярынцы, калісьці, у 1980-ых, пражылі некалькі гадоў: тата працаваў рэдактарам завадской шматтыражкі на бараньскім заводзе, матуля - настаўніцай у школе.


Што такое Барань? Барань (ад беларускага слова "бараніць") на працягу некалькіх стагоддзяў была базай спецназу ВКЛ на кірунку галоўнай пагрозы - маскоўскім. Тут жа побач - Баяры. Тут жа - Хорабрава. Тут стаялі элітныя часткі арміі ВКЛ, а зброю для іх кавалі ды правілі ў Барані (завод, колішні "Чырвоны кастрычнік", злучво савецкай абаронкі, а цяперашні "Лёс", і пачынаўся як збройня Канстанціна Астрожскага яшчэ ў пачатку 16-ага стагоддзя).


Дык вось, Зьміцер бараньскі хлопец.


Ягоны выступ на Плошчы Каліноўскага 21 сьнежня сапраўды быў ашаламляльны. Ён проста, ясна і даходліва патлумачыў, што трэба зрабіць кожнаму беларусу, каб абараніць незалежнасьць і здабыць свабоду.


Вось за гэты выступ - а таксама за тое, што Зьміцер будзіць "малую радзіму Рыгоравіча" - Шэрага Ката і ламаюць канвеерам сутак.


Увогуле, Аршаншчына яшчэ і радзіма Караткевіча, калі што. Так што дулю вам, таварышы камуністы. Нашчадка харобрай вялікалітоўскай шляхты вы не зламаеце.


А для нас, беларусаў, абавязак - падтрымаць нашага ваяра, які стаіць зараз у праломе за краіну.


Пішыце лісты. Дапамагайце перадачамі. Маліцеся. Патрабуйце свабоды.


Ворша, вуліца Энгельса 25, 211030.


Свабоду Зьмітру Казлову!


Жыве Беларусь!


Павал Севярынец, «Фэйсбук»


 

Падпіска:

Enter your email address:

КАЛЯНДАР_:

Каляндар