Удзельнікі Форума грамадзянскай супольнасці «Усходняга партнёрства»: «Версія аб самазабойстве Алега Бябеніна выклікае сур’ёзныя сумневы»

Удзельнікі Форума грамадзянскай супольнасці «Усходняга партнёрства» выступили з заявай з нагоды раптоўнай гібелі журналіста, заснавальніка сайта charter97.org Алега Бябеніна.

Тэкст заявы прыводзім цалкам:

«Мы, прадстаўнікі грамадскага сектару Беларусі, удзельнікі працэсаў Усходняга партнёрства, з вялікім жалем і болем даведаліся аб раптоўнай гібелі нашага калегі Алега Бябеніна – вядомага грамадскага актывіста, журналіста, заснавальніка і кіраўніка аднаго з найважнейшых беларускіх незалежных інфармацыйных сайтаў CHARTER97.ORG.
Мы выражаем шчырыя спачуванні сям’і Алега, яго родзічам і знаёмым, якія нечакана, у адзін дзень згубілі самага блізкага для іх чалавека.

Смерць Алега Бябеніна – таксама вялікая страта для ўсіх незалежных арганізацый, сродкаў масавай інфармацыі і журналісцкай супольнасці Беларусі.

Абставіны гэтага трагічнага здарэння, якія былі апублікаваны ў сродках масавай інфармацыі, з’яўляюцца вельмі заблытанымі і няпоўнымі, а версія аб самазабойстве Алега Бябеніна выклікае сур’ёзныя сумневы.

Сам факт гібелі Алега сведчыць аб выключна неспрыяльных умовах існавання і працы незалежных журналістаў і грамадскіх актывістаў у Беларусі, што ставіць пад вялікі сумнеў здольнасці беларускай дзяржавы развівацца ў адпаведнасці з еўрапейскімі нормамі і каштоўнасцямі.

У сувязі з гэтым мы звяртаемся да ўладаў Беларусі, адказных за расследванне гэтай трагедыі, з патрабаваннем як мага хутчэй правесці аб’ектыўныя следчыя мерапрыемствы, высветліць сапраўдныя абставіны гібелі Андрэя Бябеніна і праінфармаваць аб іх грамадзян Беларусі.

Ад імя беларускіх арганізацый грамадзянскай супольнасці-удзельнікаў Форума грамадзянскай супольнасці

Улад Вялічка, Нацыянальны каардынатар ФГС УП па Беларусі