У Беларусі не спыняюцца ператрусы і допыты актывістаў
Увечары 20 студзеня прайшоў ператрус у актывісткі «Еўрапейскай Беларусі» Паліны Дзякавай.
Днем раней берасцейскую актывістку Паліну Шарэнду-Панасюк дапыталі ў КДБ.
Як паведаміла Шарэнда-Панасюк, раніцай 19 студзеня на хатні тэлефон пазваніў следчы КДБ і заявіў, што яна ці яе муж Андрэй Шарэнда могуць днём прыйсці ў КДБ і забраць канфіскаваныя ў іх падчас вобыску 10 студзеня рэчы.
“Я зразумела, што пад гэтай маркай выклікаюць на допыт, і не памылілася, — сказала актывістка. — Калі я сёння пасля 16.00 прыйшла ў КДБ, мне прыкладна паўтары гадзіны задавалі пытанні як сведцы па крымінальнай справе аб масавых беспарадках у Мінску. На ўсе пытанні я адказвала, што буду даваць сведчанні толькі міжнароднаму трыбуналу па расследаванні злачынстваў рэжыму Лукашэнкі”.
Паводле слоў Шарэнды-Панасюк, пасля допыту ёй вярнулі частку канфіскаванага ў кватэры падчас вобыску: фотаапарат і яе мабільны тэлефон. Не вярнулі ноўтбук, бел-чырвона-белы сцяг, дыск з фільмам Юрыя Хашчавацкага “Плошча”.